Esta é unha cidade que hai tempo que esqueceu a súa orixe, o por qué da súa existencia. Agora vivimos de costas ao mar e non nos decatamos que a nosa maltratada ría é a nosa vida. Dicían os almirantes británicos que o noso era o mellor porto da costa atlántica.
Éramos un porto estratéxico porque a nosa posición estaba na metade do mundo marítimo e porque aquí, na ría, soamente entraba quén nós queríamos. Esta é unha ría que ten unha figura serpenteante e practicamente só é navegable para os grandes buques na pleamar.
O accidente do gibraltareño “Anna” é un serio aviso. O alcalde de Ferrol respira tranquilo, un cargueiro que viña baleiro. Máis, se fose un buque cheo de gas para Reganosa tería que ordenar a evacuación inmediata da nosa cidade. Un caos produto das complicidades e irresponsabilidades de Punta Promontorio, cun imposible plan de emerxencia.
Asistimos á constatación de que a crise é xeneralizara e afecta tamén á propia xustiza. Os ferroláns somos testemuñas do xuízo contra oito mariscadores, que xunto con centos de persoas en maio de 2007 protestaron en defensa da ría, fronte á entrada ilegal dos buques de GNL con destino a Reganosa.
Estes mariscadores son xulgados, máis son as primeiras vítimas, e quizais resalte o papel da fiscalía, que evidentemente, non está sendo tan eficaz en sacar á luz os escándalos políticos e económicos dese fracaso que supón a planta de gas, en Punta Promontorio.
A redución final, a un número moi pequeno de persoas acusadas, por parte da fiscalía é a evidencia da propia debilidade procesal do xuízo. Todo o mundo en Ferrol sabe da convocatoria feita nese día polo Comité Cidadán, e da participación de coñecidos dirixentes sociais, sindicais e políticos. Pretenden dar un escarmento aos mariscadores? Pois erran. Nestes tempos non son tolerables a volta dos xuízos políticos.
Alén do caso, compre unha profunda reforma que traia unha fiscalía independente do poder político e que a única presión sexa a democrática dos cidadáns. Tamén, a soberanía reside no pobo; e cando os poderes públicos son desafectos coas súas obrigas de defensa da súa sociedade, esta ten o dereito de rebelión. Algúns esquecen que o actual Estado democrático de Dereito, nace dos descamisados que derrocaron ao poder despótico.
Como podedes comprobar polas fotos estivemos no FSGal. Hoxe é un gran día para o conxunto dos movementos sociais de Galicia, e obxectivamente, para o conxunto da esquerda política – social. Dentro de dous anos, na nova convocatoria do Foro poderemos ver, non o dubidedes, como tomou corpo este proxecto colectivo ao ancho do País.
Vaille vir ben á calidade democrática, ás Institucións e aos propios partidos a existencia do FSGal. Non vai competir con eles, pero si aspira a incidir e a transformala sociedade galega desde unha alternativa netamente á esquerda. Reflexións, propostas de acción e avance social. Teses, contra teses e sínteses.
Hoxe o FSGal empeza os seus primeiros pasos, pero o camiño andado é xa moi importante. Conquerir un espazo unitario desde a esquerda sindical ou cristiá, pasando por todas as familias políticas progresistas e un vario pinto tecido asociativo, resulta o gran éxito desta xornadas. Iremos vendo os debates e as conclusión a través da web oficial do FSGal. Alimentando o discurso e a práctica dos propios colectivos de base, pero tamén dos propios partidos progresistas, hoxe alleos ao acontecido neste espazo aberto en Compostela.
Fuco Buxán estivo presente os tres días. Na inauguración, nos debates, nos plenarios e na carpa das asociacións. Obviamente, os materiais gratuítos como o libro de Homenaxe a Díaz Pardo, ou os DVD de Acsur (NIB e Noticiario InterCultural), ou sobre as mulleres palestinas esgotáronse. Pero, tamén houbo lugar para a revista Razón Socialista, os nosos carteis de Nunca Xamais ou da celebración do Chile de Allende. Así, como os nosos libros e Fucos. E estivemos a carón da mesa do Comité Cidadán de Emerxencia.
Dentro do dous anos unha nova convocatoria transversal, un novo Foro Social Galego; mentres o traballo en rede e as actividades propias de cada colectivo a prol do outro mundo e outra Galicia que son posibles.
Son consciente de que desde hai un mes teño un pouco abandonado o blog. Muitas cousas están a pasar, e que me impide ter a cabeza clara para poder escribir cun pouco de tranquilidade. Prosiguen as folgas en Megasa, disolveron a miña quenda de Laminación e pasei á sección de Acería; estiven traballando no número 25 da revista Razón Socialista, e entrevistáronme en Radio Filispim (escoitar audio).
Tamén, teño boas novas para mediados desta semana entrante: o festival o día 10 en favor de Cuba, no Teatro Jofre de Ferrol e unha nova – que ten que ver cunha amiga de Vigo – que ocurrirá o xoves 11 de decembro en Fene, e que aínda non queiro adiantar.
Máis este domingo 7 estarei en Compostela, representando á miña asociación no Plenario do Foro Social Galego. Dende o venres 5 de decembro a Asociación Cultural Fuco Buxán está a participar no mesmo.
O Foro Social Galego recolle a un centenar de entidades de toda Galicia, desde sindicatos de clase e agrarios, a Fundacións e asociacións socio-culturais, que apostan pola transformación social do planeta dende unha perspectiva de progreso e, obxectivamente de esquerdas. Supón a conexión de Galicia ao movemento internacional auspiciado polo Foro Social Mundial, e que ten a súa sede central en Brasil. Galicia súmase así tamén ao Foro Social Europeo.
A Asociación Fuco Buxán vai participar nos debates, así como na Carpa das Asociacións, cunha mesa propia, que será un divulgador durante esta fin de semana no FSGal, das actividades desta propia asociación cultural, das nosas publicacións audiovisuais (entre eles o vídeo protagonizado pola nosa ría contra Reganosa, e publicado dentro do acordo entre Fuco Buxán e Acsur no Noticiario Intercultural: “Ferrol, polo mar e a vida”), dos nosos libros e da nosa revista Razón Socialista; esta última xa leva 13 anos de existencia. Fuco Buxán naceu en 1999.
Este sábado 6, na Facultade de Filoloxía de Santiago, un dos puntos neurálxicos do FSGal, ás 12h, e a proposta de Fuco Buxán, do Comité Cidadán de Emerxencia e da ONGD Acsur – Las Segovias, celebrarase un debate que afecta á ría de Ferrol. Este celébrase baixo o título “Galicia, Territorio, Enerxía, Seguridade, Mobilización Social: O caso Reganosa”. Participarán: Manuel Rodríguez Carballeira (Voceiro do CCE e presidente de Fuco Buxán, Luz Marina Torrente (Presidenta da Plataforma de Veciños de Meá – Mugardos), os profesores Manuel Amorím e Carlos Álvarez e o ecoloxista Humberto Fidalgo.
O domingo 7, a Asociación Fuco Buxán, participará no Plenario das Asociacións do FSGal, no Auditorio de Galicia, onde se debaterán as propostas para os vindeiros tempos, a nova convocatoria do ano 2009 e a participación no Foro Social Mundial. O Foro Social Galego supón a consolidación dun movemento social transformador para outra Galicia e outro mundo que é posible.
Manuel Fraga e o PPdeG crearon o problema ubicando a planta de gas en Mugardos. Determinados grupos de presión internos do PSdeG e do BNG pretenderon consolidar unha situación ilegal e non legalizable. Así, polo tanto os tres partidos galegos teñen que dar unha solución política á veciñanza de Ferrolterra. Isto só pasa pola saída de Reganosa fóra da nosa ría.
A inseguridade xurídica que pesa sobre Reganosa, reforzada ademais coa recente sentenza do TSXG que anula a modificación do PXOM de Mugardos, ao carecer a regasificadora da obrigada Declaración de Impacto Ambiental favorable, imposible dentro da ría ferrolá; o risco dun posible accidente que afecte á poboación (lembremos que o pasado 2 de xullo o LNG Rivers tivo que virar en redondo dada a súa proximidade á costa, e iniciar unha nova manobra de entrada á ría de Ferrol); xunto co rechazo social que xenera polos seus efectos sobre a seguridade e o medioambiente; supón unha instalación que sempre estará en precario.
Mais, o apoio político á actual Reganosa atranca outros proxectos alternativos, viables e de interese para o país. Desde o Comité Cidadán seguen a plantexar que volva ao seu emprazamento orixinal, no Porto Exterior de Ferrol, que para iso foi construído, ou ben que se opte por unha plataforma OffShore. Recentemente, a Ministra de Fomento visitaba a construción dunha Terminal LNG, encargada en Cádiz para ser situada a nada menos ca dezasete quilómetros da costa adriática, ante a negativa da cidade italiana de Brindisi a tela a carón.
Tamén teño coñecemento de que o proxecto do “Superporto e Refuxio Ártabros”, continúa a súa tramitación ante os correspondentes Ministerios, apoiado por diversos grupos empresariais, incluso internacionais (véxase páxina web www.artabros.es). Este proxecto, de concretarse, non so daría resposta aos problemas da seguridade marítima galega polo seu plantexamento de Porto Refuxio e Base de Salvamento e Loita Contra a Contaminación Marítima, senón que tamén ofrece alternativas e/ou solucións aos problemas medioambientais e de seguridade de Reganosa.
Mañá domingo será a manifestación contra Reganosa. Máis esta vez hai novas importantes e que son moi saudables, para a loita democrática do pobo de Ferrolterra contra a maior agresión medioambiental e para a vida das persoas que sufre Galicia. O Tribunal Superior de Xustiza de Galicia acaba de decretar a ilegalidade da modificación do Plan Xeral de Ordenación Municipal do Concello de Mugardos polo que se daba cobertura á perigosa, ilegal e non legalizable planta de gas dentro da ría.
Ademais, o Comité Cidadán de Emerxencia para a Ría de Ferrol acaba de presentar ante a Fiscalía especial anticorrupción unha denuncia por presunto enriquecemento ilícito, onde están ademais implicados o anterior Presidente da Xunta e o seu ex Conselleiro de Economía, Srs. Fraga e Orza, respectivamente, como responsables políticos.
Tamén, a Unión Europea aceptou a trámite reiniciar o expediente aberto ao Goberno español por presunto grave incumprimento das directivas europeas de medio ambiente.
Talvez, aqueles “asesores” da actual Xunta de Galicia, e que aconsellaron aos seus titulares do PSdeG e BNG, “deixar facer” a Reganosa, teñan moito que explicarlles como lles meteron neste desaguisado. Un par de suxestións: que se desfagan deses “asesores” e que busquen unha saída política ao conflito, e iso só pasa porque a Planta de Gas non estea dentro da ría de Ferrol.
Lembrade: Domingo 8 de xuño, ás 12 horas no Peirao de Curuxeiras de Ferrol Vello. Manifestación.
Arriba tedes o vídeo da roda de prensa do Comité Cidadán, e aquí seguido podedes baixarvos o son musical da loita popular contra Reganosa.
Unha representación do Comité Cidadán está desde onte pechada na casa do Concello. Trátase de denunciar a situación na que desde o 9 de maio de 2007, atópase a ría e a cidade de Ferrol, ante a ameaza para a vida e o medio ambiente que supón Reganosa. Unha planta de gas que carece da obrigada Declaración de Impacto Ambiental e xa ten en contra dúas sentenzas do Tribunal Superior de Xustiza de Galicia.
Reganosa é perigosa, ilegal e ademais, non é legalizable. Un accidente ou atentado terían consecuencias catastróficas para nós. Lembro as declaracións do xa falecido Xeneral Gabeiras o 8 de setembro de 2001, presidente de honra do Comité Cidadán de Emerxencia, falando de que por mor da planta de Tojeiro, éramos obxectivo preferente dos terroristas. A este último faltoulle tempo para tildar a Gabeiras de tolo; o 11 de setembro Al Qaeda tiraba abaixo as Torres Xemelgas de Nova Iork.
A todo isto hai que sumarlle o pacto á siciliana firmado polo entón Presidente da Xunta, Manuel Fraga, onde esta comprometíase a pagar a falta de beneficios económicos á Reganosa do peto de todos os galegos. Reganosa é un ruinoso negocio, na actualidade está ao 30 % da súa capacidade nominal. Orza e Feijoó tamén son culpables.
A estas alturas os tres partidos galegos con representación no Parlamento de Galicia teñen responsabilidades nesta desfeita. Se un só dos grupos parlamentarios houbera pedido a planta de Reganosa fóra da ría de Ferrol, hoxe esta non estaría hoxe en Mugardos. Os cidadáns de Ferrolterra así o saben.
Agora pretenden voar o canle de entrada á ría para facilitarlle o paso aos gaseiros, máis terán que seguir a facelo coa preamar. Seguen a transportar gas por estradas en camións cisterna; e pretenden ampliar a capacidade de regasificación da planta á espera de que o Goberno central lle permita a Reganosa alimentar o sistema gasístico estatal, ante a falta de clientes galegos.
Pero, o certo é que desde a Consellería de Pesca se lles dixo aos mariscadores que non sementaran preto dos Castelos, sinxelamente van voar os seus fondos mariños, que son Rede Natura.
Ademais, o apoio político a Reganosa impide que outros operadores poidan ofertar proxectos industriais de desenvolvemento sostibles para Galicia. A proposta do superporto Ártabros como entrada de mercadorías entre América e Europa, como porto refuxio e cunha proposta de planta de gas superior a Reganosa, e cumprindo coas normativas de seguridade e legais, está á espera de mellores tempos. Polo tanto, ninguén pode dicir que non hai alternativa a Reganosa, que é unha cuestión de “patriotismo”, que este é un movemento de “non no meu patio traseiro”, de falta de solidariedade co país. Antes e agora, a isto chamábase “caciquismo”.
O 8 de xuño hai manifestación en Ferrol. Contra a maior agresión medio ambiental que sufre Galicia. Contra Reganosa, contra o desamparo no que estamos os cidadáns.
O domingo 8 de xuño, ás 12 horas acudide ao Porto de Ferrol. Contra Reganosa. Por dignidade do pobo galego. Planta de Gas, fóra da Ría de Ferrol! En defensa da vida, da ría e da legalidade!
